QuickPromo i AlcanceMax: Kiko e Source-Code ta Bisa

Hopi hende a pidi mi pa publiká esaki atrobe despues ku mi a pon’é riba mi stories. Un story ta disparsé despues di 24 ora — un artíkulo no. P’esei mi a pon’é akí, komo un link fiho ku bo por kompartí ku ken ku bo ke, i mi a ampli’é ku tur prueba, tur fuente, i un par di hèrmènt pa bo por chèk tur kos bo mes.

Promé ku tur kos

Mi konklushon

QuickPromo ta un scam.

I esaki mi no ta bisa pasobra mi ta husga for di afó, òf pasobra mi no ta gusta e kos. Mi ta bis’é pasobra mi a bai buska, i mi tin prueba di dje. Pero mi ke ku bo mira e prueba bo mes — no kere mi riba mi palabra. P’esei kada prueba akí abou tin su fuente, i e file mes ta akí riba e página pa bo buska aden.

Kuminsá ku AlcanceMax

Promé ku QuickPromo, tabatin AlcanceMax.

Djis buska “AlcanceMax scam” riba internet i bo ta sa kiko e ta. No mester di mi pa esei — e informashon ta einan kaba.

Awor, si bo ta di akuerdo ku AlcanceMax ta un scam, e ora ei sigui lesa. Pasobra lo bo komprondé dikon QuickPromo tambe ta un.

Prueba 1: Un solo file, dos marka

Ora bo habri quickpromo.live, e website ta hasi un par di API call pa karga su kontenido. Un di nan ta karga tur e teksto ku bo ta mira riba pantaya — kada boton, kada mensahe, kada splikashon. E ta un file di idioma: un lista di 719 teksto den un file JSON.

E ta públiko. Ningun login. Ningun password. E website mes ta mand’é pa kada hende ku bishit’é:

https://quickpromo.live/ssz/api/currency/common/langJSON?language=en

Mi no a “hack” nada. Mi a djis lesa loke e website ta manda pa tur hende. Un servisio públiko, urlscan.io, a graba e mesun kos na yüni 2026 — ku e mesun tres API path i e file JavaScript ku ta yama nan:

Awor, buska den e file. Mi a pone un kopia akí riba e página. Tek alcancemax — òf primi e boton:

Bo ta mir’é: 13 biaha e nomber AlcanceMax ta sali den e file di QuickPromo. Den 7 teksto diferente. Wak e parnan akí — e mesun teksto, djis ku e marka kambiá:

Ke men: ta e mesun app. Nan a kambia e nomber na afó i a laga e bieunan sinta paden. QuickPromo ta asina slordig ku nan a lubidá di kita AlcanceMax for di nan mes source-code.

Prueba 2: E mensahe pa ora nan sera bo kuenta

Den e mesun file tin un teksto ku ta yama accountBanned. E nomber ta bisa kaba pa kiko e ta sirbi: e mensahe ku un usuario ta mira ora su kuenta ta blokiá.

Anto e no ta bisa bo ku bo kuenta ta blokiá. E ta bisa bo ku tin un “ahuste regional” na kaminda. Bo ta keda warda. Bo ta pensa ku ta un problema temporal di bo region. I bo no ta sa ku bo kuenta ta será kaba.

Prueba 3: E “kosto” pa saka bo sèn

Akí ta unda e kos ta bira serio.

E file ta kontené e tabel di kosto pa saka sèn. Mi ta kopia e teksto manera e ta pará den e file:

Nan ta yama e porsentahe un “tax”. Ningun kaminda nan ta splika ki belasting esei ta, ken ta kobr’é, ni na ki pais e ta bai.

Awor hasi e matemátika. Of laga e grafiko hasié pa bo — move e slider:

Wak e liña. E ta subi, e ta kai, e ta subi, e ta kai. Kada biaha ku bo pasa 100, 400 òf 800 USDT, e kosto ta baha di golpi. Esei ta nifiká:

• Bo pidi 100 USDT → bo ta risibí 70.
• Bo pidi 800 USDT → bo ta risibí 750.
• Bo pidi 801 USDT → bo ta risibí 796.

Lesa e último dos atrobe. Pidi 800, bo ta haña 750. Pidi 801, bo ta haña 796. Bo ta pidi un dòler mas i bo ta haña 46 dòler mas.

I na e otro banda: si bo pidi 22 USDT òf ménos, e kosto ta mas grandi ku e suma mes. Bo no ta risibí nada.

Esei no ta un fout. Esei ta un diseño. Mas tiki bo ke saka bèk, mas tantu e ta kosta bo. E sistema ta kastigá hende ku ke saka un suma chikí i ta premiá hende ku ta laga nan sèn keda paden te ora e monta. I mientras bo ta warda pa e monta, bo sèn ta na nan man.

Tin un otro file ku e website ta manda pa bo browser: e file di konfigurashon (/ssz/api/currency/common/config). Den dje tin dos nùmber ku ta pega ku e tabel akí ariba:

Prueba 4: I bo sèn ta keda mará

Sigui lesa e mesun file i bo ta topa e reglanan. Kada un tin e mesun efekto: bo sèn ta drenta fásil i ta sali difísil.

Kon slordig e ta trahá

Si bo ainda tin duda ku e kos akí ta trahá na kareda, wak e detayenan akí — tur for di e mesun file:

Mientrastantu, e mesun plataforma ta bisa bo ku e tin un “AI Quant System” i un “Private Equity Fund” ku ta sigui “U.S. compliance standards”:

Un kompania ku no por skibi su mes nomber bon, pero ku tin un fondo di invershon ku ta kumpli ku regla merikano. Bo ta kere esei?

E appnan i e kompania

Dos kos mas ku ta públiko, i ku bo por chèk bo mes.

E appnan a disparsé — i a bolbe ku un otro nomber

AppBrain, un servisio ku ta sigui appnan riba Google Play, tin e dos app registrá: com.quickpromo.apps i com.alcancemax.apps. Tur dos ku e mesun publisher (Theflickson Limited) i e mesun vershon, 1.0.3. Nan no ta riba Google Play mas.

AppBrain ta bisa ku QuickPromo a wòrdu kitá dia 21 di novèmber 2025 i AlcanceMax dia 22 di novèmber 2025. Un otro servisio, Appfigures, ta mustra 3 di òktober 2025 pa QuickPromo — pues e fecha eksakto no ta sigur. I mi ke ta kla: kitamentu di un app su so no ta proba pakiko nan a kit’é. Google no ta publiká e motibu.

Pero e app no a keda kitá. Dia 19 di sèptèmber 2026 mi a lesa e file di konfigurashon ku e website di QuickPromo mes ta manda pa bo browser. Den dje tin un kampo ku yama androidLink — e link ku e app ta usa ora bo primi “download pa Android”. E ta bai pa:

Mi no a instalá e app, i mi ta konsehá bo pa no hasié. Loke mi por bisa ku sigur ta esaki: e website di QuickPromo mes ta manda bo pa PromoFlow. Esei ta e konekshon. E file di konfigurashon kompleto ta akí, manera mi a risibí e: quickpromo-config.json.

E kompania tras di e nomber

E nomber di publisher, Theflickson Limited, ta kuadra ku un kompania registrá na Inglatera. Companies House — e registro ofisial di kompania na Reino Uní — tin e kompania akí:

Inkorporá dia 9 di desèmber 2022. Disolvé dia 4 di mart 2025. Ke men: ora e appnan tabata riba Google Play (último update ougùstùs 2025), e kompania ku ta pará komo publisher no tabata eksistí mas.

I un detaye mas: e aktividat registrá di e kompania ta “59112 — Video production activities”. Un kompania di produkshon di video, komo publisher di un app di invershon den kripto.

Kiko ta e situashon awe

Dia 19 di sèptèmber 2026 mi a chèk e dominionan atrobe:

• quickpromo.live — ta na aire. E ta habri riba un pantaya di login (nùmber di telefòn + password). E file JavaScript prinsipal a kambia di nomber desde e skèn di yüni (index-COlPinds.js → index-CBwu0qMy.js): nan a hasi un update. Pero e file di idioma ta eksaktamente e mesun kos.
• quickpromo.vip — e mesun website, byte pa byte. E logo di e app ta wòrdu kargá for di e dominio akí.
• qp313.com — e mesun website, ku e mesun título (“QuickPromo - Professional Cryptocurrency Marketing Platform”). Un di e imágennan den e file di konfigurashon ta bini for di akí. “QP313” ta e nomber ku hende na Trinidad ta usa pa e mesun scam.
• qp338.com — un página di marketing: “QuickPromo - Cryptocurrency Marketing Expert”, ku frasenan manera “Building Sustainable Growth Marketing Infrastructure for the Crypto Industry”. E file di konfigurashon ta yam’é e “officialLink”.
• qp789.com — ta manda bo mesora pa un otro página. E file di konfigurashon no ta menshon’é, pero un skèner a top’é (fuente S8).
• quickpromo.top — e “channelLink” den e file di konfigurashon. Dia 19 di sèptèmber e no tabata habri.
• alcancemax.shop — e sertifikado TLS ta invalido (ERR_CERT_DATE_INVALID). Bo browser ta warna bo promé ku e habri. (E sertifikado ta loke ta hasi e slòt chikí den bo browser bèrdè. Si e ta invalido, bo browser ta bisa bo ku e website no ta sigur.)
• quickpromo.shop — dia 15 di sèptèmber e no tabata resolvé den DNS. (DNS ta e sistema ku ta konektá e nomber di un website ku e servidor kaminda e website ta biba. Si un nomber no ta resolvé, e website no ta eksistí mas riba internet.)

“Pero e ta paga!”

Esaki ta e argumento ku mi ta tende mas tantu.

“Royendgel, pero mi ta konosé hende ku a haña nan sèn. E ta paga.”

Sí. E ta paga. I esei ta kompletamente bèrdat. Pero esei no ta kontradisí nada di loke mi ta bisa — esei ta henter e punto. E modelo akí (un “task scam” híbrido) ta traha den fasenan:

1. Fase 1

   Trust — konfiansa

   Na kuminsamentu nan TA paga. Nan mester paga. Sin pago no tin nada. E promé pagonan chikí ta e produkto mas importante ku nan tin: nan ta kumpra bo konfiansa.

2. Fase 2 ← akí e plataforma tabata na sèptèmber 2026

   Social proof — prueba sosial

   Ora bo haña bo sèn, bo ta konta hende. Bo ta bisa: "e ta funshoná, mi a risibí." Bo mes ta bira nan publisidat — grátis, ku bo mes nomber i bo mes reputashon. Bo amigunan ta konfia bo, no un website.

3. Fase 3

   Krese — laga e monta

   Nan ta primintí bo rendimentu grandi si bo laga bo sèn paden mas largu — 100 dia, 150 dia, 300 dia. E tabel di kosto ta yuda: e ta hasi saka sèn chikí kostoso, pa bo laga e monta. I mas hende bo hiba, mas "coin" bo ta haña.

4. Fase 4

   Exit — nan ta bai

   Ora sufisiente sèn ta paden, e ta kaba. E pagonan ta stòp. E mensahenan ta kambia ("Regional Service Adjustment", "non-withdrawal period"). E website ta haña un otro nomber — manera AlcanceMax a bira QuickPromo, i manera QuickPromo awor ta manda bo pa "PromoFlow". I e hende ku a bai mas leu ta esun ku ta pèrdè mas.

Kaminda mi a pone e marka ta unda mi a mira e plataforma na e momento di e investigashon: den fase di konfiansa i prueba sosial. Esta, promé ku e exit.

E pagonan na kuminsamentu no ta prueba ku e kos ta legítimo. E pagonan ta e produkto. Nan ta e kos ku ta kumpra bo konfiansa pa bo hiba mas hende i mas plaka.

I kòrda: AlcanceMax a pasa e mesun fasenan kaba. E a kaba. I e a bolbe komo QuickPromo, ku e mesun kódigo. I awor tin un di tres nomber riba Google Play kaba: PromoFlow. Esei ta e prueba ku e exit ta un parti di e plan — no un aksidente.

Kon bo por verifiká esaki bo mes

Mi no ke ku bo kere mi. Mi ke ku bo chèk. Tur kos ta públiko, i bo no mester traha un kuenta ni depositá ni un sèn.

1. Usa e hèrmènt di buska riba e página akí. Tek alcancemax. Konta e resultadonan. Despues tek accountBanned i withdrawNotice3.
2. Habri e file original. Primi “Habri e file” òf “Download” riba e hèrmènt di buska. Ta un file di teksto. Bo por les’é ku kualke editor.
3. Pidi e file bo mes, for di e website. Kopia e link akí den bo browser:

   https://quickpromo.live/ssz/api/currency/common/langJSON?language=en

   Si e website ta na aire, bo ta mira e mesun file. Kompar’é ku e kopia akí.
4. Chèk e fuentenan. Tur link ta akí abou. urlscan.io, AppBrain i Companies House ta servisionan públiko ku no tin nada di hasi ku mi.
5. Warda e file awe. Ora nan realisá kiko a sali na kla, nan por kit’é. Si bo tin e kopia, bo por sigui mustra hende. E kopia riba e página akí ta keda.

Si bo tin un konosí ku ta traha ku kòmpiuter òf IT, manda nan e artíkulo akí. Nan no mester konfia mi — nan mester konfia loke nan mes ta mira.

Tur e fuentenan

Tur loke mi a usa, ku e rol ku kada un tin. E dominionan di e plataforma mes mi no a pone komo link — mi no ke manda tráfiko pa nan.

1. S1
   https://urlscan.io/result/019e9f83-8b55-73a8-8b9c-b9eea19f1e71/

   Skèn públiko históriko

   E API pathnan, e file JavaScript ku ta yama nan, e fecha (7 yüni 2026) i e hashnan di e respuestanan.
2. S2
   https://urlscan.io/result/019e9f83-8b55-73a8-8b9c-b9eea19f1e71/content/

   Kontenido di e página grabá

   E formulario di login (telefòn + password). Ningun login a wòrdu hasí.
3. S3
   https://quickpromo.live/

   E plataforma mes

   Marka, título di página, i e file di idioma (S3 + /ssz/api/currency/common/langJSON?language=en). Na aire dia 19-09-2026.
4. S4
   https://alcancemax.shop/

   E plataforma anterior

   E mesun teksto di template. Sertifikado TLS invalido dia 19-09-2026.
5. S5
   https://www.appbrain.com/app/quickpromo/com.quickpromo.apps

   Direktorio di app (observashon, no splikashon di Google)

   Package, publisher, vershon 1.0.3, último update 29-08-2025, kitá 21-11-2025.
6. S6
   https://www.appbrain.com/app/alcance-max/com.alcancemax.apps

   Direktorio di app

   Package com.alcancemax.apps, mesun publisher, mesun vershon, kitá 22-11-2025.
7. S7
   https://find-and-update.company-information.service.gov.uk/company/14533185

   Registro ofisial di kompania (Reino Uní)

   THEFLICKSON LIMITED, 14533185: inkorporá 09-12-2022, disolvé 04-03-2025. Relashon ku e appnan no ta konfirmá.
8. S8
   https://gridinsoft.com/online-virus-scanner/url/quickpromo-live

   Rapòrt di skèner

   Ta menshoná qp789.com entre e hostnan. No a wòrdu chèk — pista so.
9. S9
   https://developer.chrome.com/docs/devtools/network/reference

   Dokumentashon ofisial di Chrome

   Kon bo por eksportá un HAR sin header konfidensial, si bo ke hasi bo mes investigashon.
10. S10
    https://appfigures.com/top-apps/google-play/trinidad-and-tobago/finance?profile=product.338329951356

    Direktorio di app

    Ta konfirmá package/publisher; ta mustra 03-10-2025 komo fecha di kitamentu — diferente for di AppBrain. Dia 19-09-2026 e link akí no a habri riba e profil mas.
11. S11
    https://play.google.com/store/apps/details?id=com.pikullangit.lpb

    Google Play

    'PromoFlow' di 'Pikul Langit'. Último update 17-09-2026, 0+ download. Ta e link ku e file di konfigurashon di QuickPromo ta usa komo androidLink.
12. S12
    https://qp338.com/

    Página di marketing di e mesun grupo

    'QuickPromo - Cryptocurrency Marketing Expert'. E 'officialLink' den e file di konfigurashon. Na aire dia 19-09-2026.
13. S13
    https://quickpromo.vip/ · https://qp313.com/

    Kopianan di e mesun website

    quickpromo.vip: index.html idéntiko na quickpromo.live. qp313.com: mesun título di página. Tur dos na aire dia 19-09-2026.
14. E2
    https://www.silberie.com/evidence/quickpromo-config.json

    Kopia di e file di konfigurashon, riba e website akí

    E respuesta di /ssz/api/currency/common/config, kaptá 19-09-2026 20:15 UTC, byte pa byte. Kontené androidLink (PromoFlow), officialLink (qp338.com), channelLink (quickpromo.top), minRechargeAmount 10, minWithdrawalAmount 30. Sin datos personal. SHA-256 924649ca00bc85e33790870e7cd3dfd6bb2cbc3584ea3a8516b9c3f9c97a474b.
15. E1
    https://www.silberie.com/evidence/quickpromo-langJSON-en.json

    Kopia di e file di idioma, riba e website akí

    719 teksto, kaptá 15-09-2026. SHA-256 di e file original den e paket di investigashon: 2fd5b7b43e356543fb50470e75e31f6e22cf2c76d36c4bbaca8382043a0738c6. E mesun kontenido kaptá atrobe 19-09-2026 (SHA-256 96e2c285…307c).

Na final

Mi ta stop te akí. Mi no ta bai profundisá mas, pasobra mi no tin mester di mas. Loke mi a mustra ta sufisiente.

Mi no a hasi esaki pa ataká ningun hende ku a invertí. Hopi hende ku a drenta ta hende bon, ku a wak un chèns i a kere un amigu. Esei no ta boberia — ta konfiansa, i konfiansa ta presis e kos ku e modelo akí ta bende.

Mi a hasi esaki pa un motibu so: pa e informashon ta einan. Pa ken ku ke wak, por wak. I pa e keda — no pa 24 ora, pero te ora e no ta nesesario mas.

Loke bo ta hasi ku dje ta keda di bo.

Si bo tin abilidat téknika i bo haña algu ku mi a pasa por haltu, òf algu akí ku no ta kuadra, mi ke sa. E punto no ta pa mi tin rason — e punto ta pa e informashon ta korekto.